AHADI YA RAIS SAMIA UJENZI WA SOKO LA KIBIRIZI KISASA WAANZA KUTEKELEZWA. Market Construction

Posted on: October 27th, 2022

Na Mwandishi Wetu

Ahadi  ya Rais wa Jamhuri ya Muungano wa Tanzania Mhe. Samia Suluhu Hassani juu ya ujenzi wa Soko la Kibirizi kisasa imeanza kutekelezwa  kwa Viongozi kuanza kutembelea na kujadili namna  ujenzi  huo utakavyotekelezwa  sambamba na Ujenzi wa barabara inayopita katika eneo hilo

Akizungumza katika kikao kilichofanyika Leo Oktoba 27, 2022  katika   Ofisi ya Mkurugenzi wa Manispaa ya Kigoma/Ujiji Mhandisi kutoka Mamlaka ya Bandari (TPA) Makao makuu Eng. Twaha Msita amesema timu ya Wataalamu imekuja kwa lengo la kuangalia namna ujenzi wa soko hilo utakavyotekelezwa kama ilivyoahidiwa na Rais katika ziara yake aliyoifanya hivi karibuni Mkoani  Kigoma

Amesema katika ziara yao wametembelea  eneo  la soko la Kibirizi  ili  kupata ukubwa wa eneo, uchoraji ramani na kupata mapendekezo ya gharama ya ujenzi ikiwa ni hatua ya awali kwa lengo la kuboresha Mazingira ya Wafanyabiashara na Wajasiriamali wa Soko hilo

Ameendelea kusema kukamilka kwa ujenzi wa Soko hilo kisasa utawanufaisha  Wafanyabiashara walio wengi na biashara kufanyika katika nyakati zote ukilinganisha na sasa eneo hilo kujaa maji

Amesema miundombinu itakayojengwa katika Soko hilo ni pamoja na ujenzi wa Shedi za Wafanyabiashara wa mazao ya uvuvi, Mabanda,  Ujenzi wa Migahawa ya vyakula, Ujenzi wa vituo vya kupaki daladala, Bajaji na boda boda

Kaimu Mkurugenzi wa Manispaa ya Kigoma/Ujiji Ndugu. Evans Mdee amesema Manispaa hiyo inazingatia maagizo yaliyotolewa na Rais kwa kufanya mazungumzo na wafanyabiashara wa Soko hilo   kabla ya kuanza kwa mradi  ili kuona namna watakavyoweza kupisha ujenzi huo

Amesema  Wafanyabiashara na Wajasiriamali  watakaopisha ujenzi huo watapewa kipaumbele pindi ujenzi utakapokuwa umekamilika

Amesema kuboreshwa kwa Soko hilo kwa ujenzi kisasa kutakuza Mapato ya Wafanyabiashara, kuvutia Wateja na Wafanyabiashara Wakubwa na kuongezeka kwa mapato ya Manispaa hiyo

Ahadi ya Ujenzi wa soko la Kibirizi Kisasa ilitolewa  na Rais October 18, 2022 wakati akihutubia Wananchi waliojitokeza kumpokea eneo la Kibirizi  mara baada ya kuweka jiwe la Msingi katika Ujenzi wa bandari  ndogo ya Kibirizi