ANWANI ZA MAKAZI KURAHISISHA HUDUMA ZA MAENDELEO KWA JAMII, Postcode

Posted on: February 22nd, 2022

Na Mwandishi Wetu

Kukamilika kwa zoezi la anwani za makazi kutarahisisha Serikali  kufikisha huduma za maendeleo na manunuzi ya Kidigitali kwa Wananchi

Ameyasema hayo Mratibu wa zoezi la ukusanyaji wa anwani za Makazi Manispaa ya Kigoma/Ujiji Ndugu. Haji Omary Mwilima leo Februari 22, 2022 alipokuwa katika kipindi cha #Goodmorning Kigoma kinachorushwa  kila siku asubuhi na Radio joy 90.5

Mratibu huyo amesema kukamilika kwa zoezi hili kutafanya Serikali kuwa na takwimu sahihi  ya maeneo yanayohitaji  huduma za kijamii kama vile afya, elimu, na miundombinu mbalimbali ambazo  Wananchi   wa eneo husika wanahitaji ikiwa ni pamoja na kurahisisha upelekaji wa huduma hizo

Ameendelea kusema  kukamilika kwa zoezi hilo kila Mtanzania atakuwa na anwani halisi ya Makazi yatakayosaidia kila mtu kupatikana kirahisi, utambulisho wa watu, usajili wa biashara na mali na kuboreshwa kwa taarifa ya vizazi na vifo katika jamii

Kukamilika kwa zoezi hilo pia kutusaidia kufanyika kwa biashara mtandaoni ambapo Wafanyabiashara na wanunuzi watakuwa na uwezo wa kununua na kumfikishia mteja bidhaa, upatikanaji wa huduma za dharura kama vile polisi, huduma za zima moto kwa   uharaka kutokana na uwepo wa anwani na taarifa kamili za kila mtu    

Amesema zoezi hilo litafanyika kwa kutoa namba ya anwani ( namba ya jengo, au kiwanja),  majina ya barabara au kitongoji   na postikodi

Aidha ameendelea kusema hadi sasa tayari Makundi mbalimbali yamepata mafunzo ya namna zoezi hilo litakavyofanyika wakiwemo Madiwani, Watendaji kata na Mitaa na uelimishaji huo unatarajia kufanyika kwa Wenyeviti wa Mitaa na vijana  watakaohusika katika zoezi hilo

Amehitimisha kwa kuwataka Wananchi, Taasisi za Serikali na zisizo za Serikali kushiriki kikamilifu na kutoa ushirikiano wa watakaokuwa wakikusanya taarifa hizo wakishirikiana na viongozi wa kata na mtaa