KAMATI YA SIASA CCM MKOA WA KIGOMA YARIDHISHWA NA UJENZI WA VYUMBA VYA MADARASA 48 MANISPAA YA KIGOMA/UJIJI. Political party

Posted on: January 17th, 2022

Na Mwandishi Wetu

Kamati ya siasa ya Chama cha Mapinduzi (CCM) Mkoa wa Kigoma Leo Januari 17, 2022 imefanya ziara ya kutembelea utekelezaji wa Ilani  Manispaa   ya Kigoma/Ujiji  huku wajumbe wakipongeza ubora wa ujenzi wa vyumba vya madarasa ambao umekamilika

Pongezi hizo zimetolewa na wajumbe wa kamati hiyo wakiongozwa na Mwenyekiti wa Chama hicho Ndugu. Amandus Nzamba  mara baada ya kufanya ziara katika Shule ya Sekondari Buteko, Gungu, Buhanda na Shule ya Sekondari Kigoma/Ujiji

Mwenyekiti huyo amesema kamati imeridhishwa na ujenzi wa vyumba 48 vilivyojengwa kutokana na fedha za Ustawi wa Taifa na  mapambano dhidi ya Uviko-19  huku akiwataka Madiwani wa Manispaa ya Kigoma/Ujiji kuendelea kusimamia Wataalamu katika miradi na kupata matokeo yenye ubora na kuwànufaisha wananchi walio wengi  

Naye Mkuu wa Mkoa wa Kigoma Ndugu. Thobias Andengenye akiongea na Wanafunzi wa kidato cha kwanza ambao wameanza masomo yao   katika madarasa hayo amewataka kusoma kwa bidii na kuhakikisha wanatumia  na kutunza miundombinu ya madarasa, viti na Meza

Kaimu Mkurugenzi wa Manispaa ya Kigoma/Ujiji Ndugu. Frednand Filimbi awali akiwasilisha taarifa amesema Manispaa hiyo ilipokea kiasi cha Fedha Million Mia tisa sitini (Tsh 960,000,000/=) kutoka Serikali Kuu kwa lengo la ujenzi wa vyumba vya madarasa 48 kwa shule 16 na kusema Ujenzi huo umekamilika kwa wakati

Ameendelea kusema kukamilika kwa Ujenzi huo wa vyumba vya madarasa utawanufaisha mwanafunzi zaidi ya Elfu mbili mia nne (2400)  na kukuza mazingira ya Ufundishaji na Ujifunzaji huku akisema tayari  wanafunzi wameanza kuyatumia madarasa hayo

Miradi mingine iliyotembelewa na Kukaguliwa ni Ujenzi wa Chanzo cha Maji Amani Beach, Ujenzi wa Machinjio ya Ujiji yenye thamani ya Mradi Million Mia mbili hamsini (Tsh 250,000,000/=)   hadi kukamilika, Ujenzi wa Zahanati ya Rusimbi, Ujenzi wa barabara za Legeza Mwendo yenye urefu wa Km 0.56 gharama ya Mradi ikiwa ni Tsh 509, 864,505.00/= , Barabara ya Mabatini yenye urefu wa Km 0.6, na Ujenzi wa barabara ya Muungano "B" kwa Kiwango cha lami tabaka mbili yenye urefu wa Km 0.22 zikijengwa kwa gharama ya Tsh 499,999,200.00/= ikiwa ni fedha zitokanazo na Tozo za Mafuta Nchini