KAMATI YA SIASA YA CCM WILAYA YA KIGOMA YAFANYA ZIARA KUKAGUA UTEKELEZAJI WA ILANI YA CHAMA HICHO MANISPAA YA KIGOMA/UJIJI, YAWATAKA WATAALAMU KUTOZALISHA KERO KWA WANANCHI, CCM visit

Posted on: March 12th, 2020

Na Mwandishi wetu

Kamati ya siasa ya Chama Cha Mapinduzi(CCM) Wilaya ya Kigoma jana march 12, ilifanya ziara Manispaa ya Kigoma/Ujiji kukagua utekelezaji wa Ilani ya chama huku wakiwaasa Wataalamu wa Halmashauri hiyo kutozarisha kero na  kuwasumbua wananchi katika utoaji wa huduma

Aliyasema hayo Katibu Mkuu wilaya ya Kigoma wa Chama hicho Ndugu. Jumanne Kitundu alipokuwa katika kukagua miradi iliyotekelezwa na inayoendelea kutekelezwa kwa kipindi hiki cha serikali ya Awamu ya Tano

Alisema katika utendaji kazi wa watumishi wa serikali zipo taarifa za baadhi ya watumishi kutotoa huduma kwa wananchi kwa uzuri hivyo watumishi hao kutumia lugha zisizositahiri katika maeneo yao ya kazi na kuleta huduma mbovu serikalini na wengine kuzalisha matatizo au kero kwa wananchi

Aliendelea kusema  “Ninyi watumishi mnapaswa kuwa waamifu katika kazi zenu za kila siku mnazozifanya, na taarifa tunazo kwa wasiowaamifu na mnaotoa lugha zisizo sahihi na wengine kutumia mda mwingi bila sababu kutoa huduma jambo ambalo halikubaliki, Niwatake ninyi kama Watumishi tumieni maadili yenu ya kazi kufanya kazi kwa uaminifu ili tufike pale tunapotarajia kufika kama Watanzania”

Wakiwa katika eneo la Mlima Masanga ambapo ni chanzo cha mapato cha madini ya Manispaa hiyo Afisa Mapato Ndugu . Amoni  Ndakize alitoa taarifa na kueleza kuwa chanzo hicho kwa mwaka 2019 kimeingiza zaidi ya Fedha za Kitanzania Shilingi  Millioni Moja(1,000,000/=) licha ya changamoto ya namna watoza ushuru wanavyokusanya kutokana na ukubwa wa mlima huo

Wakiwa katika kitalu cha michikichi eneo la Katosho Mkuu wa idara ya Kilimo, Ushirika na Umwagiliaji Ndugu. Haruna Mtandanyi akitoa taarifa alisema kwa sasa Manispaa  imejikita katika uzalishaji wa miche ya michikichi kutokana na sera ya kuinua zao hilo na kusema  lengo la kuzalisha miche  milioni moja laki saba na elfu hamsini(1,750,000) ambapo michikichi hiyo itagawiwa kwa wananchi pasipo gharama yeyote

Aliendelea kusema hadi sasa miche elfu kumi na moja (11,000) tayari ipo katika viliba na mbegu zaidi ya elfu thelathini(30,000) zimesha zalishwa katika vitalu ili kuweza kuhamishia katika vitalu ambapo hadi kufikia mwezi Desemba, 2020 miche hiyo itakuwa tayari kusambazwa kwa wananchi na wakulima ambapo itakuwa na uwezo wa kuzalisha Tani 4 za mafuta ya mawese kwa hekari kwa mwaka tofauti na michikichi ya sasa  yenye uwezo wa kuzalisha Tani 1.5 kwa hekari kwa mwaka

Aidha wajumbe hao wa kamati ya siasa  wakitoa maoni yao katika ziara waliyoifanya, Katibu Mwenezi wa wilaya (CCM) Ndugu. Haruna Kambilo ameipongeza serikali ya Awamu ya Tano kwa kuendelea kuleta miradi mbalimbali katika Manispaa hiyo na kuwapongeza wasimamizi  ambao ni wataalamu

Aliendelea kutoa ushauri kuwa Manispaa ya Kigoma/Ujiji katika ukusanyaji mapato ihakikishe pia inarudisha maendeleo kwa kuboresha miundombinu katika vyanzo inavyokuwa inakusanya huku akitaka katika uchimbaji wa madini mlima wa Masanga kuweka miundombinu imara ya barabara ya kuwezesha usafirishaji na kuwapa mikopo wachimbaji hao ya vifaa vya uchimbaji

Kaimu mkurugenzi wa Manispaa ya Kigoma/Ujiji Ndugu.Frednand Filimbi katika ziara hiyo aliipongeza kamati ya siasa ya chama hicho kwa ziara waliyoifanya huku akiahidi kutekeleza ushauri walioutoa na kuendelea kutekeleza na kusimamia ilani ya Chama hicho

Katika ziara hiyo  miradi mingine iliyotembelewa ni pamoja na ukarabati wa shule ya sekondari Lubengera unaoendelea, Machinjio ya Kibirizi na Ujiji, Soko la samaki la Kibirizi, Dampo la Kisasa Msimba,barabara 8 zilizojengwa chini ya mradi wa TSCP zenye urefu wa Km 11.97, eneo la soko la samaki soko la Kigoma mjini, ujenzi wa Zahanati unaoendelea eneo la Buronge, Makumbusho ya Dr.Living stone Ujiji, stesheni ya Kimoja, na barabara ya Katonga inayoendelea kujengwa kwa kiwango cha lami.

ingia katika maktaba ya picha kuona picha zaidi ya ziara hiyo