Mradi wa USAID Kizazi kipya wapongezwa Mkoani Kigoma, organisations

Posted on: August 19th, 2021

Na Mwandishi wetu

Mradi wa USAID Kizazi kipya  Jana August 18, 2021 ulipongezwa na wadau mbalimbali ikiwemo wanufaika wa mradi huo  Mkoani Kigoma  

Pongezi hizo zilitolewa katika tukio la Kufunga mradi wa USAID kizazi kipya kwa ngazi ya Mkoa lililofanyika katika Ukumbi wa Hotel ya Sunset iliyopo Manispaa ya Kigoma/Ujiji

Mgeni Rasmi katika tukio hilo Kaimu Mganga Mkuu wa Mkoa Dr. Godfrey Smart aliishukuru taasisi ya  BAKAIDS kwa kusimamia mradi huo wa Kizazi kipya kwa kutoa huduma za Afya na UKIMWI, ulinzi na Usalama wa Mtoto na ukuzaji wa kaya Kiuchumi

Pia Mgeni Rasmi aliwapongeza wafadhili wa Mradi huo kwa kutoa fedha zao katika kuboresha na kukuimarisha nyanja mbalimbali za Maisha ya wakazi wa Mkoa wa Kigoma huku akiwataka kushirikiana na Serikali katika Kuimarisha elimu ya Lishe na Kutokomeza ugonjwa wa Malaria  Mkoani hapo

Akitoa taarifa ya shughuli zilizotekelezwa na mradi kwa kipindi cha Miaka minne (2018-2021) Afisa Afya na Ukimwi  BAKAIDS Ndugu. Hamisi Karisha alisema  mradi umekuwa ukiwafikia watoto na wazazi wanaoishi na  Ukimwi , kupunguza umasikini miongoni mwa Wahitaji na kuongeza uelewa juu ya haki za watoto na kupinga ukatili wa Kijinsia

Alisema kwa Mkoa wa Kigoma awali Mradi wa USAID Kizazi kipya ulifadhiliwa kwa Halmashauri ya Kibondo, Halmashauri ya Manispaa ya Kigoma/Ujiji na Halmashauri ya Wilaya ya Uvinza, na baadae Halmashauri ya Kibondo kuondolewa katika mradi huo

Akitoa takwimu alisema mradi Umefanikiwa kuwafikia Wanufaika elfu saba mia nane ishirini na mbili (7,822) kwa Halmashauri ya mbili ambapo Bima ya afya kwa kaya elfu moja mia tatu hamsini na moja (1,351) na kuwafikia walengwa elfu nne mia tatu themanini na nane (4,388), mafunzo ya ufundi stadi yakitolewa kwa vijana watano (05) na wanafunzi mia mbili kumi na sita (216) wakipatiwa vifaa vya shule  

Diwani wa Kata ya Kitongoni Manispaa ya Kigoma/Ujiji Mhe. Himidi Omary alipongeza mradi wa USAID Kizazi kipya kwa namna walivyokuza uchumi kwa kutoa fedha na vifaa vya kazi kwa vijana na makundi mbalimbali ya waathirika wa Virusi vya Ukimwi na kusema wao kama wawakilishi wa wananchi watahakikisha wanafatilia maendeleo ya walionufaika na mradi huo

Diwani  huyo aliwataka viongozi wa BAKAIDS kusajiri vikundi walivyokuwa wakihudumia ngazi ya Halmashauri ili vipate sifa ya kuhudumiwa Mikopo ya Wanawake, Vijana na watu wenye ulemavu  ambapo Manispaa ya Kigoma/Ujiji ilikuwa na vikundi  vya wajasiriamali

Thelathini na saba (37) vikiwa na wanachama mia nne thelathini na tisa (439) na Uvinza wakiwa na vikundi 10 vyenye wanachama mia mbili kumi na tisa (219) katika mradi wa USAID Kizazi kipya

Mmoja wa wanufaika wa Mradi wa USAID Kizazi kipya Mkazi wa Manispaa ya Kigoma/Ujiji Bi. Revina Mabuga  alisema yeye ni mwanachama katika kikundi cha wajasiriamali kilichokuwa kikifadhiriwa na mradi huo   na wao kama wanachama wameweza kupata mafunzo na semina  mbalimbali za umufamaji mashuka,  kilimo cha bustani na utengenezaji sabuni jambo ambalo limekuza uchumi wao

USAID Kizazi kipya ni mradi uliokuwa chini ya asasi ya kiraia BAKAIDS ukifadhiriwa na Mfuko wa Dharura wa Rais wa Marekani wa kupambana na UKIMWI (PEPFAR) na Shirika la Maendeleo ya Kimataifa (USAID) ambapo Nchini Tanzania ulianza rasmi mwaka 2016