RC ANDENGENYE AZINDUA ZOEZI LA UGAWAJI VYANDARUA MKOA WA KIGOMA. Malaria protection

Posted on: May 28th, 2025

Jumla ya kaya 503,762 zinatarajiwa kunufaika na mpango wa ugawaji wa vyandarua 1,775,359 vilivyotolewa na Serikali kupitia Ofisi ya Rais TAMISEMI kwa kushirikiana na Wizara ya Afya ikiwa ni utekelezaji Mpango wa Taifa wa kudhibiti Maralia (NMCP) ambapo  Mkoa wa Kigoma ni miongoni mwa mikoa yenye kiwango kikubwa cha maambukizi.

Akizindua rasmi zoezi la ugawaji wa vyandarua hivyo kupitia hafla fupi iliyofanyika katika Zahanati

ya Mtaa wa Rusimbi Manispaa ya Kigoma Ujiji, Mkuu wa Mkoa wa Kigoma Thobias Andengenye amesema  kwa mujibu wa taarifa zinazotolewa kupitia mfumo wa kutolea taarifa za wagonjwa (TDHS), kwa mwaka 2024 jumla ya wagonjwa 309,080 walibainika na maambukizi ya ugonjwa huo kimkoa, ambapo idadi ya vifo ilikuwa watu  264 vikihusisha watoto 177 na watu wazima 87.

Amesema vyandarua hivyo vinatolewa bure na serikali hivyo wasimamizi wanapaswa kusimamia vizuri zoezi la ugawaji  ili viwafikie walengwa huku akitoa wito kwa wanufaika kufanya matumizi sahihi ili viweze kuleta tija katika kukabiliana na maambukizi ya ugonjwa wa maralia mkoani Kigoma na nchini kwa ujumla.

Aidha amewataka  walengwa ambao watanufaika na mpango huo katika halmashauri zote nane za mkoa, kuvitumia vyandarua hivyo kwa usahihi na kuachana na dhana potofu kuwa matumizi yake yanaweza kuchangia kupunguza nguvu za kiume au kusababisha changamoto za uzazi kwa wanawake.

Naye Katibu Tawala Mkoa wa Kigoma Hassan Rugwa amesema zoezi la ugawaji wa vyandarua hivyo litazigusa kaya zote ndani ya mkoa wa Kigoma.

Amesema wakazi  wameendelea kuwa mashuhuda kwa ⁰kujionea namna serikali ya awamu ya sita inavyoendelea kuwagusa wananchi kupitia uboreshaji mkubwa katika utoaji wa huduma za Afya nchini.

Victor Sungusia, Afisa Ugavi MSD  amewataka wananchi kutumia vyandarua hivyo kwa lengo la kujikinga na maralia ili kutumia muda wao katika kufanya kazi za maendeleo badala ya kushinda wakishuhulikia changamoto za kiafya zitokanazo na maradhi hayo.