"TUBORESHE ELIMU KIGOMA/UJIJI" DC KIGOMA education

Posted on: February 16th, 2023

Na Mwandishi Wetu

Mkuu wa Wilaya ya Kigoma Ndugu. Salum Hamisi Kali amewataka maafisa elimu kata Manispaa ya Kigoma/Ujiji kusimamia suala la ufundishaji na ujifunzaji kwa lengo la kuendelea kukuza elimu na viwango vya ufaulu Shuleni

Ameyasema hayo Leo February 16, 2023 alipofanya kikao na maafisa elimu ngazi ya Kata katika ukumbi wa Manispaa ya Kigoma/Ujiji

Mkuu huyo wa Wilaya amewataka kusimamia na kudhibiti utoro kwa kufanya vikao na kamati za Shule kwa kushirikiana na Wenyeviti wa Serikali za mitaa na   kubaini Wanafunzi ambao wanashindwa kuhudhuria masomo na kuhakikisha Wanafunzi wote waliochaguliwa kujiunga na masomo ya upili wanaripoti kabla ya March 01, mwaka huu

Aidha amewataka maafisa elimu hao kusimamia miradi inayoendelea kujengwa kwa kuhakikisha thamani ya miradi na fedha  iliyopangwa vinaendana

Awali Afisa Elimu Msingi Ndugu. Richard Mtauka kwa niaba ya Afisa elimu Sekondari amesema Wanafunzi 5574 sawa na asilimia 92 wameanza masomo huku ambao hawajaripoti wakiendelea kufuatiliwa  na maafisa elimu ngazi ya kata wakishirikiana na viongozi ngazi ya mtaa  

Naye Afisa elimu kata ya Rusimbi Ndugu. Lilenga Issaya amemhakikishia Mkuu huyo wa Wilaya kufanya kazi kwa pamoja kwa kushirikiana na Viongozi wa elimu hata kuwashirikisha katika mikutano ya kitaaluma kwa lengo la kuinua ufaulu na viwango vya elimu kwa shule za Msingi na Sekondari

Mkuu huyo wa Wilaya amekuwa akikutana na makundi mbalimbali ya wadau wa maendeleo kwa lengo la kupanga na kuweka mikakati katika sekta mbalimbali  na ameahidi kufanya ziara Shuleni kwa kufanya vikao na Walimu pamoja na Wanafunzi kwa lengo la kukuza viwango vya elimu