UJENZI WA SOKO LA KIBIRIZI KISASA MICHORO YAWASILISHWA, AHADI YA RAIS YAENDELEA KUTEKELEZWA market

Posted on: February 11th, 2023

Na Mwandishi Wetu

Michoro ya ujenzi wa soko la Kibirizi kisasa Jana February 10, 2023 iliwasilishwa  Kwa Wakuu wa idara na Vitengo,wakiwa na Viongozi wa Wafanyabiashara wa soko hilo

Uwasilishaji huo ulifanyika katika Ukumbi wa Manispaa ya Kigoma/Ujiji na Wataalamu na Wahandisi kutoka mamlaka ya Bandari (TPA) mara baada ya kufanya upembuzi wa awali

Mhandisi kutoka Mamlaka ya Bandari (TPA) Makao makuu Eng. Twaha Msita  awali akiwasilisha Mwonekano wa michoro ya Ujenzi wa soko hilo alisema awali ziara ilifanyika katika soko hilo kwa lengo la kutambua ukubwa wa eneo na kujua gharama za vifaa vya ujenzi katika Manispaa ya Kigoma/Ujiji

Aliwasilisha michoro itakayojengwa katika Soko hilo ikiwa ni pamoja na michoro  ya Ujenzi wa  Shedi za Wafanyabiashara wa mazao ya uvuvi, Mabanda,  michoro ya Ujenzi wa Migahawa ya vyakula, michoro ya  ujenzi wa vituo vya kupaki daladala, Bajaji na boda boda

Mhandisi kutoka Mamlaka ya Bandari (TPA) Eng. Hamis Mbutu aliwataka Wataalamu, Viongozi wa Wafanyabiashara, Wafanyabiashara pamoja na Wananchi kuendelea kutoa maoni juu  ya Ujenzi wa soko hilo na kujengwa kulingana  mahitaji ya Watumiaji wa  soko hilo

Aidha katika kikao hicho, Wataalamu na Viongozi wa Wafanyabiashara walitoa maoni na mapendekezo ya awali, huku akisema maoni mengine yataendelea kukusanywa kwa Wadau kama Vile Wafanyabiashara,  Wananchi pamoja  na Viongozi wa Kisiasa na Serikali

Itakumbukwa pia ujenzi wa soko hilo kisasa ni ahadi ya Rais wa Jamhuri ya Muungano wa Tanzania Mhe. Dr. Samia Suluhu Hassan aliyoitoa October 18, 2022 akiwahutubia wananchi wa eneo la Kibirizi mara baada ya kuweka jiwe la Msingi katika Ujenzi wa bandari ndogo eneo la Kibirizi

Rais alisema kutokana na maboresho ya Bandari yanayoendelea Serikali italeta fedha ili mabanda yaliyopo soko la kibirizi yajengwe kisasa kwa lengo la kuboresha mazingira ya Wafanyabiashara wa soko hilo waliopo jirani na bandari hiyo

Ujenzi wa soko hilo la Kibirizi kisasa utawanufaisha Wafanyabiashara soko kuwa na Miundombinu ya Kisasa, Uwepo wa mifumo ya Ulinzi na Usalama, kukua kwa biashara ya Wafanyabiashara,  na Halmashauri katika ukusanyaji wa Mapato