WAKUU WA IDARA NA VITENGO KIGOMA/UJIJI WATAKIWA KUJENGA UPENDO MAHALA PA KAZI ,, semina

Posted on: July 21st, 2022

Na Mwandishi Wetu

Wakuu wa idara na  Vitengo Manispaa ya kigoma/Ujiji wametakiwa kujenga Mahusiano mazuri  kwa kuwa na upendo mahala pa kazi na watumishi wanaowaongoza

Yamesemwa hayo na Mwezeshaji wa Mafunzo ya Malezi, Unasihi na Ulinzi wa Mtoto Kitaifa Ndugu. Cornel Kisinga  katika Mafunzo yaliyoandaliwa na Shirika la UNICEF la  kuijengea uwezo  Kamati tendaji ya Halmashauri (CMT) juu ya Ulinzi na Usalama wa Watoto na Wanawake  iliyofanyika Leo July 21, 2022 katika Ukumbi wa Manispaa hiyo

Amesema katika kuhakikisha malengo ya Taasisi yanafikiwa Wakuu wa Idara na Vitengo wana wajibu wa kusimamia na kuhakikisha Watumishi wanaowaongoza wanajua malengo ya idara zao , Matumizi sahihi ya Rasilimali, na kujua Sheria zinazoongoza utendaji wao

Aidha amesema upendo baina ya watumishi ni muhimu  mahala pa kazi na nje ya maeneo ya kazi ili kusaidiana katika mambo mbalimbali jambo linalokuza ufanisi wa kazi  na kufìkia malengo yaliyokusudiwa

Mratibu wa Mafunzo ambaye pia ni Afisa Ustawi wa jamii Manispaa ya Kigoma/Ujiji Bi. Agnes Punjila amewataka Viongozi hao kuhakikisha wanawalinda Watoto na Wanawake katika vitendo vya ukatili ambavyo vimekuwa vikijitokeza katika Jamii huku wakiaswa kuwa na mda wa kutosha wa kukaa ili  kujadili changamoto na Mafanikio ya familia    

Mkuu wa idara ya Elimu Sekondari Ndugu. Kanjanja Lawi amesema Mafunzo hayo ni mhimu kwa watumishi wote  ili kukuza utendaji mahala pa kazi, kukuza mahusiano na namna ya kushughulikia migogoro

Mada nyingine iliyowasilishwa ni pamoja na Msaada wa Kisaikolojia na changamoto za Kisaikolojia kama vile Afya ya akili, na namna  ya kushughulikia msongo wa mawazo mahala pa kazi