WALENGWA WA TASAF MANISPAA YA KIGOMA/UJIJI KUNUFAIKA NA VIKUNDI VYA KUWEKA AKIBA NA KUKOPA

Posted on: December 1st, 2021

Na Mwandishi Wetu

Mafunzo ya mpango wa kuhamasisha jamii ya kuweka  akiba na kuwekeza yamefunguliwa Manispaa ya Kigoma/Uji ji kwa lengo la kuwawezesha wanufaika wa TASAF  kuwekeza kupitia taasisi za kifedha (Vikundi) ili kuinua vipato vya kaya na kuondokana na umasikini

Mafunzo hayo yamefunguliwa leo Desemba 1, 2021 katika ukumbi wa Manispaa hiyo ambapo Wataalamu mbalimbali wanapatiwa mafunzo  ya siku tano (05)  ya nadharia na vitendo  kwa lengo la kuelimisha na kuhamasisha uundaji wa vikundi vya kuweka akiba katika mitaa

Akifungua mafunzo hayo Kaimu Mkurugenzi wa Manispaa ya Kigoma/Ujiji  Ndugu. Frednand Filimbi  amewataka  wawezeshaji hao watakaopatiwa mafunzo kutoa elimu kwa weredi kwa walengwa wa TASAF namna na hatua ya kujiunga katika vikundi vya kuweka na kukopa  huku akiwataka kujenga ushirikiano kwa viongozi wa Kata na Mitaa na kuhakikisha wanufaika wanajiunga kwa wingi

Mmoja wa wawezeshaji  Kitaifa kutoka TASAF Makao makuu Ndugu. Geradi Adolfu  amesema  katika kipindi cha TASAF Awamu ya tatu kaya Maskini  walipata mafunzo ya Ujasiriamali na mbinu za kuunda vikundi endelevu vya kuweka akiba ambapo jumla ya Vikundi elfu ishirini na tatu mia sita kumi na nane (23,618) vyenye jumla ya wanachama laki tatu kumi na tisa mia tisa arobaini (319,940) viliundwa kwa Halmashauri sabini na nane (78)  kutoka Tanzania Bara, Unguja na Pemba na wameweza kukusanya akiba ya Shilingi Bilion 5.9 kati ya hizo billion 2.5 zimekopeshwa kwa wanachama riba nafuu

Naye Mratibu TASAF Manispaa ya Kigoma/Ujiji Ndugu. Izack Vyabandi amesema  kwa mwaka wa fedha  2014/2015 hadi 2020/2021 Halmashauri hiyo imeshapokea  kiasi cha fedha  jumla ya Billion kumi na moja million mia sita ishirini na tano laki nane hamsini na nne elfu mia mbili kumi na tisa (Tsh 11,625,854,219.74/=) na kuwafikia walengwa wa kaya Maskini kwa vipindi thelathini na moja (31) vya malipo

Ameendelea kusema  manispaa ya Kigoma/Ujiji ina jumla ya Kaya elfu saba mia tisa hamsini na nne (7,954) ambazo ni wanufaika wa TASAF  na inatarajia kuunda vikundi mia tano thelathini (530) vyenye idadi ya wanakukikundi kati ya kumi (10) hadi kumi na tano (15)

Aidha amesema mpango wa kunusuru kaya Maskini Manispaa ya Kigoma/Ujiji katika kipindi cha TASAF awamu ya tatu  kaya elfu sita mia tisa hamsini na mbili (6,952)  zinamiliki aina mbalimbali za mifugo na kujishughulisha na shughuli za uzalishaji mali

Mmoja wa wawezeshaji ambaye amehudhuria mafunzo hayo ambaye ni Mtaalamu wa Kilimo Ndugu. Haruna Mtandanyi amesema  elimu watakayoipata itawawezesha kwenda kuhamasisha  uundaji wa  vikundi vya kuweka na kuwekeza  ili kuongeza kipato, fursa na kuinuka kiuchumi kwa kaya Maskini

Mpango wa kunusuru kaya Maskini Manispaa ya Kigoma/Ujiji unatekelezwa katika mitaa arobaini na tisa (49) kati ya Mitaa sitini na nane (68) sawa na asilimia sabini (70%) ya utekelezaji kwa kaya maskini