"WALIMU ZINGATIENI MAFUNZO " Bi. PANGANI MRATIBU MSAIDIZI WA MRADI WA SHULE BORA education

Posted on: December 14th, 2022

Na Mwandishi Wetu

Mratibu Msaidizi wa Mradi wa Shule Bora OR- TAMISEMI Bi. Adelaida Pangani amewataka walimu kuzingatia mafunzo yenye lengo la  kuinua ubora wa  elimu Nchini

Aliyasema hayo Jana Desemba 13, 2022 katika Mafunzo ya  siku mbili (02)  ya Walimu Kazini (MEWAKA)   yanayoendelea katika Shule ya Msingi Kigoma yakihusisha  Watendaji Kata, Waratibu Elimu Kata, Walimu Wakuu, Walimu Wataaluma na Walimu Mahili wa Shule za Msingi zilizopo  Kata za Kigoma na Bangwe  

Alisema lengo la Mafunzo hayo ni kuwawezesha Walimu kuibua hadithi za mafanikio za kujifunza za mfano zinazopatikana miongoni mwao ili kutatatua changamoto za ujifunzaji na ufundishaji ili kuinua ubora wa elimu nchini

Aliwataka Wasimamizi wa  elimu ngazi za Kata kila mtu kutekeleza wajibu wake kwa kuwashirikisha Wazazi na wadau mbalimbali  wa elimu katika kukuza elimu Nchini

Mradi wa Shule bora  umelenga kuinua kiwango cha elimu jumuishi pamoja na kuweka mazingira salama ya kujifunzia kwa Wanafunzi wote wa kike na wa kiume katika Shule za Serikali za Tanzania  kwa ufadhili wa Serikali ya Uingereza kupitia mfuko wa UK aid , gharama za mradi zikiwa ni Shilingi za Kitanzania bilion 271 na utafanya katika ngazi zote za mradi katika mikoa ya Kigoma, Katavi,  Rukwa, Singida,  Dodoma, Simiyu, Mara, Tanga na Pwani ambapo utafikia kikomo  mwaka 2027