WANAUME NA WANAWAKE WASHAURIWA KUVUNJA UKIMYA KWA VITENDO VYA UKATILI KATIKA YA NDOA ZAO marriage

Posted on: November 29th, 2021

Manispaa ya Kigoma/Ujiji imeendelea kuadhimisha siku kumi na sita (16) za kupinga ukatili wa Kinjisia kwa kutoa elimu kwa vikundi vya wajasiriamali ikiwemo Wanawake na Vijana    

Siku ya Ijumaa Novemba 26, 2021 Maafisa Maendeleo ya Jamii wakiambatana na Wataalamu kutoka Ofisi ya BAKAID-Kigoma  chini ya Ufadhili wa Shirika la Norwegian Church Aid (NCA).  walitembelea na kutoa elimu ya kupinga vitendo vya ukatili katika  kikundi cha Wajasiriamali Wanawake kilichopo kata ya Kasimbu  (kikundi cha Huruma) wanaojishughilisha na  Ushonaji shuka, Kilimo cha Bustani , Utengenezaji wa Sabuni za Maji na Miche  

Wanachama wa Kikundi hicho walitakiwa kutovumilia na kuficha vitendo vya ukatili vinavyofanyika kwenye ndoa na familia , na kutoa taarifa katika vyombo vya kupinga unyanyasaji huo kama vile Dawati la Jinsia jeshi la Polisi, Ofisi za Ustawi wa Jamii na Maendeleo ya Jamii, Ofisi ya Mtendaji Kata na Mtaa ili kuepukana na athari za vitendo hivyo kama vile vifo, udhalilishaji na chuki

Afisa Maendeleo ya Jamii  Manispaa ya Kigoma/Ujiji Ndugu. Majira Jabir akifafanua aina za ukatili alisema Upo ukatili wa kihisia kama kuwatukana Watu  kwa maneno ya udhalilishaji , ukatili wa Kibaguzi ambapo baadhi ya watoto katika familia hupewa kazi kubwa na nyingi ukilinganisha na umri wao, ukatili wa vipigo, na ukatili wa Kiuchumi ambapo Mwanaume au mwanamke humkataza mmoja wapo kujishughulisha uzalishaji mali pasipo sababu yeyote

Mwanasheria na Wakili  kutoka Shirika la Norwegian Church Aid (NCA) Bi. Rosalia Ntirihungwa  alisema ni kosa kisheria kwa watoto wadogo chini ya Umri wa Miaka kumi na nane (18) kuingizwa na kulazimishwa kuoa au kuolewa kwa Lengo la kujipatia kipato kwa wazazi au walezi

Aidha aliendelea kuwataka wazazi na walezi kuendelea kuimalisha ulinzi kwa watoto na kuhakikisha wanapata Mahitaji Mhimu ikiwa ni pamoja  kuwapeleka shule kwa  lengo la kujipatia elimu

Afisa Mradi wa kupambana na vitendo vya ukatili wa Kijinsia kutoka BAKAID Kigoma Ndugu. Juma Bewa alisema elimu hiyo itaendelea kutolewa kwa makundi mbalimbali kwa lengo la kutokomeza vitendo hivyo vya ukatili katika Manispaa hiyo

Elimu ya kupambana na vitendo vya ukatili imeendelea kutolewa Leo Novemba 29, 2021 kwa makundi  mbalimbali kama vile Madereva boda boda na  tax katika Kata ya Gungu na Kibirizi, na kwa Mwaka huu maadhimisho haya Kitaifa yana  kauli mbiu " Ewe Mwananchi, Komesha ukatili wa Kijinsia sasa"