WATOTO CHINI YA MIAKA MITANO KUPATA CHANJO YA POLIO WILAYANI KIGOMA, Vaccine

Posted on: November 15th, 2022

Na Mwandishi Wetu

Wazazi wenye watoto chini ya miaka mitano (5)  Wilaya ya Kigoma wametakiwa kushiriki zoezi la utoaji chanjo ya Ugonjwa wa Polio inayotarajia kutolewa kuanzia Novemba 17-20, 2022

Ameyasema hayo Katibu Tarafa Ndugu. Maximilian Cyrilo kwa niaba ya Mkuu wa Wilaya ya Kigoma wakati akifungua kikao cha afya msingi cha  Wilaya hiyo  kilichofanyika Leo Novemba 15, 2022  katika ukumbi wa Redcross  kwa lengo la kuwajengea uelewa wajumbe wa kikao na Kushiriki katika uelimishaji katika zoezi la Utoaji chanjo

Kiongozi huyo amewataka Wazazi na Walezi  kutoa ushirikiano   kwa timu za wachanjaji watakapofika na kupita   nyumba kwa nyumba na katika vituo vyote vya kutolea huduma za afya ili jamii kuepukana na athari zitokanazo na ugonjwa wa polio

Mratibu wa Chanjo Manispaa ya Kigoma/Ujiji Ndugu. Waziri Shabani Ramadhani awali akiwasilisha taarifa   amesema Ugonjwa wa Polio unaosababishwa na kirusi ambacho huambukizwa kutoka kwa mtu aliyeathirika kwenda kwa mwingine kwa kula au kunywa kitu kilichochafuliwa na kinyesi chenye virusi vya Polio

Ameendelea kusema virusi vya Polio vinapoingia mwilini huathiri mfumo wa fahamu na kusababisha madhara kiafya ikiwa ni pamoja na kupooza kwa ghafla kwa kiungo au viungo na hata kupelekea kifo