ZOEZI LA KUWABAINI WANAFUNZI WENYE CHANGAMOTO YA KUTOKUSIKIA (UZIWI) LAANZA KIGOMA/UJIJI Disability

Posted on: April 5th, 2023

Na Mwandishi Wetu

Manispaa ya Kigoma/Ujiji imeanza zoezi la upimaji na kuwabaini  Wanafunzi wa Shule za Sekondari wenye changamoto ya kutokusikia (uziwi)

Zoezi hilo limeanza Leo April 05, 2023 kwa Wanafunzi wa Shule ya Sekondari Buronge na Masanga kwa lengo la kuwatambua ili kubaini mbinu za ufundishaji na kuinua ufaulu katika masomo yao

Zoezi hilo limefanyika kwa kupima uwezo wa usikivu wao likihusisha uwepo wa Wazazi na Walezi ili kupata elimu namna ya kuishi nao na kupinga vitendo vya ukatili

Mtaalamu wa kuhudumia wenye Matatizo ya kutokusikia na Mwalimu. Titus Rubundi Hamis katika zoezi hilo amesema changamoto ya Kutokusikia na Uziwi  kunachangiwa na kuugua mda mrefu mara kwa mara na matumizi ya dawa kali kwa Watoto, na matibabu yasiyo rasmi

Amewataka Wazazi na Walezi kukaa na Watoto wao mara kwa mara na kubaini changamoto zao kupitia michezo na malezi ya kila siku ili kupatiwa matibabu mapema kabla ya kukua kwa tatizo

Afisa elimu Maalumu Sekondari Manispaa ya Kigoma/Ujiji Ndugu. Shingwa Hamisi Shingwa anasema Wanafunzi wenye changamoto za ulemavu wanakutana na changamoto ya kutengwa na kuwa wapweke hali inayoweza kusababisha kushuka kwa taaluma  

Amesema elimu imeendelea kutolewa  kuhusiana na elimu jumuishi ikiwemo ujenzi  miundombunu sahihi ili kuhakikisha elimu inatolewa kwa usawa

Ameitaka Jamii, Wadau na Taasisi mbalimbali kujitokeza kuwasaidia Wanafunzi na Watoto wenye changamoto ya usikivu (uziwi) kwa kutoa vifaa vya  usaidizi wa kusikia ikiwa ni pamoja na ulemavu mwingine

www.kigomaujijimc.go.tz