FURSA YA TAKA KIGOMA/UJIJI, sanitation

Posted on: March 30th, 2021

Na Mwandishi wetu

Wakuu wa Idara na Vitengo Manispaa ya Kigoma/Ujiji wametakiwa kuwawezesha kuwainua  wananchi kiuchumi kwa kuwapatia elimu ya uchakataji wa taka zinazozalishwa katika Manispaa hiyo

Ushauri huo umetolewa na Mtaalamu wa Mazingira na uchakataji taka Ndugu. Patrick Matandala kutoka kampuni ya Belgium Development Agency wakati akitoa Mafunzo ya siku mbili yaliyofanyika kuanzia  March 29-30,2021 katika  Ukumbi wa Hoteli ya Greenview namna ya udhibiti na upunguzaji wa taka mjini

Mtaalamu huyo amesema zipo fursa mbalimbali ambazo wananchi wanapaswa kuzifanya kutokana na  taka zinazalishwa, kusanywa na kupelekwa dampo la kisasa la Msimba ambapo kwa sasa fursa kubwa ni pamoja na utengenezaji wa mbolea ya Mboji na mbolea za viwandani kwa ajili ya wakulima wa ndani na nje ya mji huo

Ameendelea kusema fursa zingine ni pamoja na  kubadili matumizi (Recycling) na kutumika tena (Re-use) kwa vitu kama vile plastiki na chuma ili kuhakikisha gharama za usafirishaji wa taka unapungua na mji unakuwa safi kutokana na taka hizo kutumika kwa namna nyingine bora

Aidha Kaimu Mkurugenzi wa Manispaa ya kigoma/Ujiji na Mkuu wa idara ya Mipango miji na Ardhi  Ndugu. Brown Nziku  amewaomba wawekezaji kuja kuwekeza katika Manispaa hiyo na kuchangamkia fursa za ugeuzaji taka kuwa malighafi zingine zinazoweza kutumika kwa matumizi mengine ya binadamu kutokana na uzalishaji wa taka kuwa mkubwa

Kaimu Mkurugenzi huyo amewataka wananchi  kuunda  vikundi vya wajasiriamali na kuvisajili ili viweze kuwezeshwa kupata mikopo isiyokuwa na riba na kuhakikisha wananchi kupitia vikundi hivyo wanachangamkia fursa hizo ikiwa ni pamoja na uzoaji taka katika mitaa na makazi ya watu ili kuhakikisha mji unakuwa safi na watu kujiajiri na kuzalisha ajira ya kazi hiyo

Wataalamu hao wamehitimisha mafunzo hayo kwa kufanya ziara katika vizimba vya ukusanyaji taka na kutembelea kikundi cha Umoja kinachopatikana kata ya Gungu eneo la veta wanaojishughulisha na uchakataji wa taka za plastiki kwa kuzisaga na kusafirisha bidhaa hiyo kwa ajili ya Masoko katika Jiji la Dar es salaam

Inakadiriwa kuwa kwa kila mkazi wa Manispaa ya Kigoma/Ujiji anazalisha kilogram 0.5 kwa siku na Kwa sasa Manispaa ya Kigoma/Ujiji inazalisha tani mia moja na arobaini (140) za taka kwa siku  na uzalishaji huo umekuwa ukikua kutokana na hali ya ukuaji wa mji  kwa ongezeko la idadi ya watu

Picha na video zaidi bofya http://www.kigomaujijimc.go.tz/sinlge-gallery/vifaa-na-mafunzo-ya-usafi-na-mazingira-kutoka-kwa-kampuni-ya-lawatama