KAMATI YA SIASA YA CCM WILAYA YA KIGOMA YARIDHISHWA NA UJENZI WA MADARASA MANISPAA YA KIGOMA/UJIJI, School Buildings

Posted on: December 30th, 2021

Na Mwandishi wetu

Kamati ya siasa ya Chama cha Mapinduzi (CCM) Wilaya ya Kigoma Leo Desemba 30, 2021 imefanya ziara ya kutembelea ujenzi wa Madarasa arobaini na nane (48)  uliokuwa unaendelea kwa Shule za Sekondari kumi na Sita (16) Manispaa ya Kigoma/Ujiji huku ikiridhishwa na Ubora na viwango vya ujenzi huo  

Ziara hiyo imefanyika ikiongozwa na Mwenyekiti wa Chama hicho Wilaya ya Kigoma Ndugu. Alhaji Yassin Mtalikwa ambapo  amesema Lengo la ziara hiyo ni kukagua,  kusimamia  na kujiridhisha na Utekelezaji wa Ilani  kwa viwango na ubora unaohitajika  

Aidha Mwenyekiti huyo amesema Chama cha Mapinduzi (CCM) Wilaya ya Kigoma imefanya ukaguzi wa miradi hiyo na kujiridhisha na usimamizi uliofanyika na Wataalamu huku akisema madarasa hayo yapo katika viwango vilivyowekwa  kutokana  na makisio  yaliyotolewa na Wahandisi wa Ujenzi

Mwenyekiti huyo wa Wilaya amempongeza Mwenyekiti wa Chama cha Mapinduzi Taifa na Rais wa Jamhuri ya Muungano wa Tanzania Mhe. Samia Suluhu Hassan  kwa kutoa fedha za Ujenzi huo akishirikiana na Shirika la Fedha IMF Kwa kutoa fedha hizo huku akisema miundombinu hiyo itaboresha Mazingira ya Ufundishaji na Ujifunzaji  

Mkurugenzi wa Manispaa ya Kigoma/Ujiji  Ndugu. Athuman Msabila amesema mafanikio ya Ujenzi huo kwa wakati imechagizwa na kamati za usimamizi zilizoundwa na ununuzi wa vifaa vya ujenzi uliofanyika mapema huku akisema wanafunzi wote wa Kidato cha kwanza wataochaguliwa wataanza masomo kwa wakati mapema mwezi Januari 2022

Manispaa ya Kigoma/Ujiji  ilipokea  kiasi cha fedha za Kitanzania Million Mia tisa sitini (960,000,000/=) kutoka Serikali Kuu kutokana na Mkopo uliotolea wa Shirika la Fedha IMF ili kujenga vyumba vya madarasa arobaini na nane (48) kwa shule za Sekondari kumi na sita (16) ikiwa ni jitihada za kuinua Uchumi na   kupambana athari za Uviko-19 Nchini Tanzania