KITUO CHA AFYA KILICHOJENGWA KWA FEDHA ZA TOZO, CHAANZA KUTOA HUDUMA MANISPAA YA KIGOMA/UJIJI Health Centre

Posted on: November 9th, 2022

Na Mwandishi Wetu  

Kituo cha afya kipya cha Buhanda kilichopo Manispaa ya Kigoma/Ujiji kilichojengwa kwa fedha za tozo (kodi) ya miamala ya simu Jana Novemba 08, 2022 kilifunguliwa kwa lengo la kuanza kutoa huduma za afya kwa Wananchi

Kituo hicho kilifunguliwa na Mkuu wa Wilaya ya Kigoma Bi. Ester Alexander Mahawe   ambapo aliwataka Wananchi kutunza miundombinu ya kituo hicho ili  kuwanufaisha Watu wengi

Mkurugenzi wa Manispaa ya Kigoma/Ujiji Ndugu. Athuman Msabila alisema ujenzi wa Kituo hicho uliohusisha Jengo la Wagonjwa wa nje, Maabara na kichomea taka umegharimu kiasi cha fedha za Kitanzania Millioni Mia tano (Tsh 500, 000, 000/=) ikiwa ni fedha kutoka Serikali kuu iliyotokana na kodi za miamala ya simu

Alisema Serikali inaendelea kutekeleza miradi ya afya katika  Manispaa hiyo na inatarajia  kupokea kiasi cha fedha za Kitanzania Million mia tano (Tsh 500, 000, 000/=) kutoka Serikali Kuu  kwa ajili ya ujenzi wa Hospitali ya Wilaya itakayojengwa Kata ya Kagera  

Mkurugenzi  huyo alisema kwa sasa ujenzi wa  jengo jingine la  upasuaji na wodi ya wazazi unaendelea kwa fedha za Kitanzania Million mia mbili hamsini (Tsh 250, 000, 000/=) kutoka Serikali Kuu   katika kituo hicho cha afya

Naye Mganga Mkuu wa Manispaa hiyo Dr. Hashimu Mvogogo alisema tayari wahudumu wa Afya watano (05) na Mganga wa Kituo hicho wamepangwa  na huduma zitakazoanza kutolewa ni pamoja na huduma kwa wagonjwa wa nje (OPD) pamoja na kupumzisha, huduma za dharura, huduma za kimaabara huku akisema kukamilika kwa miundombinu inayoendelea kujengwa kutaanza kutolewa kwa huduma ya upasuaji na huduma ya baba,Mama na mtoto

Naibu Meya wa Manispaa hiyo Bi. Mgeni Kakolwa aliwataka wahudumu wa Afya kufanya kazi kwa weredi kwa kuzingatia misingi ya kazi na upendo kwa Wananchi wanaowahudumia huku akiipongeza Serikali kwa uboreshaji wa miundombinu unaoendelea  katika Manispaa hiyo

Diwani wa Kata ya Buhanda Mhe. Gilberth Kilahumba aliishukuru Serikali kwa kuendelea kujenga, kuboresha na kusogeza huduma mbalimbali kwa Wananchi kama vile Ujenzi wa Madarasa na  miradi ya Afya katika Kata hiyo

Kukamilika kwa ujenzi wa kituo hicho cha afya cha Buhanda kunafanya Manispaa hiyo kuwa na jumla ya idadi ya vituo vya afya Vitatu (03)   ikiwemo  kituo cha afya cha Ujiji na kituo cha Afya Gungu