MAANDHIMISHO YA MIAKA 60 YA UHURU YAZINDULIWA MANISPAA YA KIGOMA/UJIJI

Posted on: December 6th, 2021

Na Mwandishi Wetu

Manispaa ya Kigoma/Ujiji imezindua sherehe za  miaka sitini (60) ya Uhuru  wa Tanzania kwa kufanya usafi katika soko la Buzebazeba na upandaji Michikichi kando ya barabara ya Mwasenga

Uzinduzi huo umefanyika ukiongozwa na Mgeni rasmi  Mkuu wa Wilaya ya Kigoma Bi. Ester Alexander Mahawe ambapo ameshiriki shughuli hizo

Mkuu huyo wa Wilaya akiwa katika soko la Buzebazeba  amewataka wafanyabiashara wa soko hilo kuzingatia suala la Usafi ili kudumisha afya zao na wanunuzi wa bidhaa kwa kuzuia milipuko ya Magonjwa inayoweza kutokea

Ameendelea kusema Upo mkakati wa kuanzisha mashindano ya Usafi wa Masoko ili kuhakikisha usafi unadumishwa na masoko yanakuwa rafiki katika shughuli za Kiuchumi            

Aidha amewataka kuhakikisha wakazi wa Manispaa ya Kigoma/Ujiji  wanapanda miti ya Zao la Michikichi ili kutunza Mazingira na kupata faida ya mazao ya kiuchumi kama ambavyo Rais wa Awamu ya Kwanza na Mpigania Uhuru Hayati Mwalimu. Julius Kambarage Nyerere alipigania suala la Utunzaji wa Mazingira

Mkuu huyo wa Wilaya amesema maadhimisho hayo yanatarajiwa kuhitimishwa Desemba 9, ambapo kutakuwa na maonesho kwa wafanyabiashara na wajasiriamali kuonesha bidhaa zao katika Uwanja wa  Mwanga Community Centre na Michezo mbalimbali ikifanyika kwa makundi mbalimbali wakiwemo Wazee, Vijana, na Watoto  

Rais wa Jamhuri ya Muungano wa Tanzania Awamu ya Kwanza Hayati Mwalimu Julius Kambarage Nyerere aliwahi kusema  "Kuharibu Mazingira ni kuiba mali ya Vizazi ambavyo havijazaliwa, Ni kudhulumu haki ya Watoto na Wajukuu wa vizazi vijavyo, Mazingira mazuri tuliyonayo ni urithi kutoka vizazi vilivyotangulia, Hivyo ni Wajibu wa kuyalinda na  kuyatunza Mazingira yetu "    

Tanzania husherehekea Maadhimisho ya Uhuru Desemba 9, kila Mwaka ambapo Mwaka 1961 Tanzania wakati huo Tanganyika ilipata Uhuru kutoka kwa wakoloni Waingereza