MACHINGA WA SOKO LA MWANGA MANISPAA YA KIGOMA/UJIJI WAPONGEZA UTARATIBU ULIOTUMIKA KUPANGIWA MAENEO YA BIASHARA Traders

Posted on: October 29th, 2021

Na Mwandishi wetu

Machinga wanaofanya biashara maeneo yasiyo rasmi soko la Mwanga leo October 29, 2021 wamepangiwa na   kugawiwa maeneo ya kufanyia biashara zao eneo  la seremala lililotengwa kwa ajili ya wajasiriamali hao huku wakipongeza utaratibu uliotumika katika zoezi hilo

Akizungumza wakati wa kuwapangiwa machinga hao, Mkuu wa Wilaya ya Kigoma Bi. Ester Alexander Mahawe amesema zoezi hilo limefanyika kwa njia Shirikishi ambapo viongozi wa machinga wamekuwa  wakishiriki katika kila hatua ya kupangiwa maeneo ya kibiashara yaliyoboreshwa ikiwa ni pamoja na kupata majina ya wafanyabiashara wadogo (Machinga)

Mkuu wa Wilaya amesema kabla ya zoezi hilo Ofisi ya biashara Manispaa ya Kigoma/Ujiji ilipokea majina ya wafanyabiashara wadogo (Machinga) Mia nne themanini na Sita (486) waliojiandikisha kwa viongozi wao huku maeneo yaliyopimwa katika  eneo hilo  yakiwa  Mia nne tisini na Sita (496)    

Mkuu wa Wilaya ameendelea kusema hakutakuwa na viashiria vya upendeleo katika kupata maeneo ya  biashara ambapo utaratibu wa kusoma majina kwa kuchukua karatasi zenye namba ya eneo la kufanyia biashara  ndilo litakalotumika kwa kila Machinga

Mkurugenzi wa Manispaa ya Kigoma/Ujiji Ndugu. Athumani Msabila amewataka wafanyabiashara hao wadogo (Machinga) kuhakikisha wanatunza Mazingira katika eneo hilo jipya  kwa kutokutupa taka ovyo na kuhakikisha kanuni za afya zinazingatiwa huku   akisema miundombinu katika eneo hilo itaendelea kuboreshwa  

Baadhi ya viongozi wa Machinga wa soko la Mwanga akiwemo Ndugu. Ali Jafari amesema zoezi hili limekuwa Shirikishi tangu hatua ya kwanza kwa kufanya vikao na Mkuu wa Wilaya na kusema wao kama viongozi ndio wameshiriki kuandika majina ya machinga wote pasipo kuwa na upendeleo

Nao baadhi ya  Machinga akiwemo Bi. Agnes na  Madua Ahamadi wamepongeza zoezi lilofanyika katika kupata maeneo ya biashara zao huku wakisema njia hiyo ya kuandika namba  za  viwanja na machinga kuchukua karatasi hizo zinaondoa migigoro ya wengine kuona wamependelewa      

Zaidi www.kigomaujijimc.go.tz