MBINU ZA UFUNDISHAJI ELIMU JUMUISHI KWA MEMKWA ZAJADILIWA KIGOMA/UJIJI Education

Posted on: March 26th, 2023

Na Mwandishi Wetu

Waratibu wa elimu Kata na Walimu wa Mpango wa elimu ya Msingi kwa Watoto Walioikosa (MEMKWA) Manispaa ya Kigoma/Ujiji Leo March 26, 2023 wamehitimisha mafunzo ya siku tatu (03) yaliyokuwa na lengo la kujifunza namna ya ufundishaji elimu Jumuishi kwa Wanafunzi wenye mahitaji Maalumu  

Mafunzo hayo yalifunguliwa siku ya Ijumaa March 24, yakiongozwa na Wakufunzi kutoka Chuo cha Ualimu Patandi Arusha yakifadhiliwa na Shirika la UNICEF

Katika mafunzo hayo mikakati na mipango  ya namna ya ufundishaji Wanafunzi wenye Umri miaka  8-13 na kwa vijana walio na umri 14-18  kupitia elimu ya MEMKWA kwa  Wenye ulemavu na wenye mahitaji Maalumu yaliweza kujadiliwa

Walimu wa MEMKWA wamesisitizwa kuendelea kuwatambua Wanafunzi wenye ulemavu na wenye mahitaji Maalumu na kuhakikisha wanazingatia mbinu  za ufundishaji ili kufikia malengo yaliyokusudiwa

Wametakiwa Kuzingatia elimu Jumuishi kwa kuhakikisha wenye ulemavu na wasio walemavu wanajifunza pamoja ili kuondoa dhana potofu kuhusu ulemavu na kuendelea kuwajengea stadi za maisha  

Mada mbalimbali ziliwasilishwa na kujadiliwa ikiwemo Ubainishaji wa makundi  mbalimbali ya watoto wenye mahitaji maalumu, afua stahiki kulingana na makundi ya watoto wenye mahitaji maalumu, Wanafunzi wenye ulemavu kushiriki shughuli za Kitaalamu na kijamii, na Uboreshaji na uimarishaji wa miundombinu rafiki kama Madarasa na vyoo