MDAHALO WA HEDHI SALAMA WAFANYIKA MANISPAA YA KIGOMA/UJIJI , WAZAZI WA KIUME WATAKIWA KUVUNJA UKIMYA

Posted on: May 27th, 2022

Na Mwandishi Wetu

Wazazi  wa Kitanzania wametakiwa kuvunja ukimya na kuzungumza na watoto wao juu ya hedhi salama na kuepukana na mitazamo hasi

yamesemwa hayo katika Mdahalo ulioandaliwa na Shirika la Bakaids wakishirikiana  Shirika la  Norwegian Church Aid(NCA) uliofanyikia Shule ya Sekondari Katubuka iliyopo Manispaa ya Kigoma/Ujiji likihusisha Washiriki Wanafunzi kutoka Manispaa ya Kigoma/Ujiji na Halmashauri ya Wilaya ya Uvinza

Mgeni Rasmi wa Mdahalo huo na Afisa Elimu Taaluma Manispaa ya Kigoma/Ujiji Bi. Tabu Maalim amesema wazazi wa Wanafunzi wa kike wana wajibu  wa kutenga bajeti kila mwezi kwa ajili ya kununua taulo za kike pindi wanapokuwa katika siku zao ikiwa ni pamoja na kuwajenga kiakili ili waweze kujiamini pindi wanapokuwa wakifanya kazi zingine ikiwemo Masomo   katika kipindi hicho          

Aidha Mgeni Rasmi huyo  amewataka Wanafunzi wa kike kuendelea kujifunza elimu zaidi juu ya hedhi salama kwa kuzingatia usafi, kutumia taulo kwa usahihi na kuepukana na dhana potofu ili kuendelea kujifunza Masomo ya kitaaluma katika kipindi chote cha hedhi

Amewataka wadau mbalimbali, Asasi, na  Mashirika kuendelea kutoa elimu ya hedhi salama na kutoa vifaa kama vile taulo,  ujenzi wa vyumba vya kujisitiri mashuleni huku akisema Serikali itaendelea kutenga  bajeti ya kuunga jitihada za hedhi salama katika taasisi za elimu

Mratibu wa afya ya uzazi Manispaa ya Kigoma/Ujiji Bi. Pendo Samizi amewataka wanafunzi hao wa Shule za Msingi na Sekondari kuzingatia usafi kwa kuoga kila mara pindi wanapokuwa katika siku za hedhi huku akisema uvaaji wa taulo moja ya kike  zaidi ya masaa manne ni hatari kwa afya

Ameendelea kusema athari za kutozingatia usafi wa mwili katika kipindi cha hedhi salama ni pamoja na Muwasho, halafu mbaya na kupata ugumba

Afisa elimu afya Manispaa ya Kigoma/Ujiji Bi. Gunaguje Bukeye  amesema kwa sasa Serikali imetoa mwongozo wa kujenga kwa vyumba vya kujisitiri kwa wanafunzi wa kike katika miundombinu yote ya Vyoo vinavyojengwa kwa Shule zote huku akiendelea kusema kuwa   Serikali inatenga  bajeti ya afya katika fedha za uendeshaji shule jambo linalofanya Walimu Wakuu Mashuleni kununua vifaa tiba vya huduma ya kwanza ikiwemo taulo za kike

Afisa Mradi wa  Shirika la Bakaids  Ndugu. Juma Bewa amesema  shirika hilo litaendelea kushirikiana na Serikali kwa kutoa elimu  ya hedhi salama ili kuhakikisha Wanafunzi walio wengi kuepuka vizuizi, unyanyasaji na dhana potofu katika kipindi chote cha Masomo hata anapokuwa katika jamii

Mchungaji wa Kanisa la CCT na Mratibu wa Waking the Giant Nchini Tanzania Mch. Modest Pesha   akishiriki Mdahalo huo kwa njia ya mtandao amewataka wazazi wa jinsi ya kiume kuzungumza na watoto wao na kuwa msitari wa mbele katika kuwahudumia taulo za kike katika kipindi chote na kuhakikisha upatikanaji wa vifaa vya usafi majumbani ili kuepukana na magonjwa yatokanayo na uchafu katika kipindi cha hedhi

Awali wakichangia katika Mdahalo  huo Mwanafunzi wa Shule ya Sekondari Kandaga Wilayani Uvinza Vanesa Omary na  na Mwanafunzi wa  Shule ya Sekondari Katubuka Anna John  wamesema wanafunzi wengi wa kike kila mwezi kukosa Masomo kuanzia siku Sita (6) hadi nane (8) ambapo hukumbana na athari za kushuka kitaaluma,  kunyanyaswa na Wanafunzi wa kiume na kuwashusha thamani huku wakiitaka Serikali na vyombo vya habari kuendelea kutoa elimu juu ya hedhi salama kwa makundi yote ndani ya jamii  

Maadhimisho haya yamewashirikisha wawakilishi wa Wanafunzi Wilaya ya Uvinza na Manispaa ya Kigoma, Wataalamu wa Afya, Viongozi wa Dini, Wataalamu wa Elimu, wazazi na Vyombo vya habari na maadhimisho haya Kitaifa Mwaka huu yanafanyikia Mkoani Kigoma Uwanja wa Mwanga Community centre kesho May 28, 2022