MRADI WA SHULE BORA UNALENGA ELIMU KWA WATOTO WOTE Education

Posted on: February 6th, 2023

Na Mwandishi Wetu

Mshauri wa elimu kutoka taasisi ya British High Commission iliyopo Jijini Dar  es salaam Ndugu. Collin Bangay siku ya Ijumaa February 03, 2022 alihitimisha  ziara ya siku tatu (03) Mkoani Kigoma akikagua namna mradi wa Shule bora unavyotekelezwa Mkoani hapo

Ziara hiyo ilianza February 01,  kwa kufanya vikao na Viongozi ngazi ya Mkoa, Halmashauri, Kata  na Shule kwa kuongea na Walimu pamoja na kukagua namna Wanafunzi wanavyoshiriki katika zoezi la ujifunzaji

Desemba 02, Akifanya ziara Halmashauri ya Mji wa Kasulu na Halmashauri ya Wilaya ya Kasulu aliwataka Viongozi wa elimu kuendelea kutatua changamoto mbalimbali zilizopo katika sekta ya elimu kwa kushirikiana na jamii

Aidha aliwataka viongozi kuendelea kuinua kiwango cha elimu jumuishi kwa kuwatambua watu wenye ulemavu na kuweka  mazingira salama ya kujifunzia kwa Wanafunzi wote wa kike na wa kiume

Afisa elimu Taaluma Mkoani Kigoma Ndugu. David Mwamalasi alisema Serikali inaendelea kusimamia na kuhakikisha  makundi yote wanapata elimu kwa usawa pasipo upendeleo

Alisema Serikali inaendelea kushirikiana na jamii kuinua viwango vya elimu, uwepo wa  usalama na usawa katika kuhakikisha watoto wote wanapata elimu bora

Afisa Elimu Halmashauri ya Wilaya ya Kigoma Bi. Elestina Chanafi alisema mradi wa Shule bora umewawezesha Wataalamu wa Halmashauri hiyo kufanya utatifiti juu ya sababu inayochangia Wanafunzi kuwa watoro kipindi cha masomo na tayari wameanza kuzitafutia ufumbuzi matokeo ya tafiti hiyo

Mwalimu Mtaaluma wa Shule ya Msingi Mazoezi Kabanga iliyopo Halshauri ya Mji wa Kasulu   Anna Dismas alisema katika Shule hiyo Wanafunzi wenye mahitaji maalumu na Walimu wa Shule hiyo kupitia mradi wa Shule bora wamepata mafunzo ya Walimu kazini (MEWAKA) ambayo yamewasaidia katika uboreshaji wa Ufundishaji na ujifunzaji katika Shule hiyo

Mradi wa Shule Bora ni mpango wa elimu wa Serikali ya Tanzania kwa ufadhiri wa Mfuko wa UK aid unaolenga kuunga mkono uboreshaji wa elimu Msingi Tanzania ukiweka mikakati sahihi na kuhakikisha watoto wote wenye ulemavu, wanaoishi katika Mazingira magumu,  wasichana na wavulana wanapata elimu bora

Mradi huu unatekelezwa katika Mikoa ya Kigoma,  Pwani, Dodoma, Singida, Tanga, Katavi,  Simiyu,  Mara na Rukwa