UJENZI WA SOKO LA MWANGA KISASA KUANZA, WAFANYABIASHARA WASHAURIWA, full council

Posted on: May 18th, 2022

Na Mwandishi Wetu    

Baraza la Madiwani Manispaa ya Kigoma/Ujiji limeridhia wafanyabiashara wa soko la Mwanga kupisha ujenzi wa soko hilo kisasa hadi kufikia June 30, 2022 na kuhamia soko la jipya la Masanga lililotengewa

Baraza hilo lililofanyikia ukumbi wa Manispaa hiyo leo May 18, 2022 limeridhia  mara baada ya Meya na Mwenyekiti wa baraza hilo Mhe. Baraka Naibuha Lupoli   kuruhusu Wàheshimiwa Madiwani  kupiga kura ili ujenzi kufanyika katika soko hilo

Meya na Mwenyekiti wa Baraza hilo  amesema  kujengwa kwa soko hilo kutaboresha mazingira ya wafanyabiashara Manispaa ya Kigoma/Ujiji kwa kukuza mapato ya ndani na kuvutia wawekezaji  kibiashara

Ameendelea kusema kujengwa kwa soko hilo  kisasa kutaboresha Mandhari (mwonekano) na kupendezesha na kukuza usafi  wa Manispaa ya Kigoma/Ujiji  

Akihutubia baraza hilo Mkuu wa Wilaya ya Kigoma Bi. Ester Alexander Mahawe amelipongeza Baraza la Madiwani kwa uamuzi waliofanya kutokana na mpango wa kuanza ujenzi wa soko ili kuboresha Mazingira yatakayokuza uchumi wa Wafanyabiashara na wakazi wa Manispaa hiyo

Ameendelea kuwataka wafanyabiashara wa soko hilo kuitikia wito wa kuondoka mapema kabla ya  tarehe iliyopangwa  na kuhamia soko jipya la Masanga ambalo wametengewa kufanya biashara zao katika kipindi chote cha ujenzi wa soko hilo la Mwanga kisasa

Mkuu huyo wa Wilaya amehitimisha kwa kulitaka Baraza la Madiwani  kuanza kutafuta vyanzo vingine vya fedha ili kuanza ujenzi wa soko la Kigoma Mjini ili kuendelea kuboresha maisha ya wakazi wa Manispaa ya Kigoma/Ujiji kutokana na manufaa ya ujenzi huo  

Naye Diwani wa Kata ya Kasingirima Mhe. Abdallah Kiembe amesema kuanza kwa ujenzi huo kutakuza uchumi na kuboresha huduma bora kwa Wananchi wa Manispaa ya Kigoma/Ujiji  kwa kuinua vipato vyao

Mwenyekiti wa Chama cha Mapinduzi (CCM)   Wilaya ya Kigoma Ndugu. Alhaji Yassini Mtalikwa amesema chama hicho kinaridhishwa na utendaji kazi wa baraza hilo la Madiwani  huku akisema hawatavumilia viongozi wowote wanaohujumu na kukwamisha  miradi ya maendeleo inayoendelea kutekelezwa Manispaa ya Kigoma/Ujiji

Awali Mkurugenzi wa Manispaa ya Kigoma/Ujiji Ndugu. Athumani Msabila akiwasilisha taarifa amesema Soko la Mwanga linatarajiwa kujengwa kisasa Mapema kuanzia mwezi July, Mwaka huu kwa ufadhili wa Benki ya Dunia (WB)  kupitia mradi wa TACTICS huku akisema tayari wafanyabiashara wameshaarifiwa  kuhamia soko la Masanga ili kupisha ujenzi huo kabla ya June 30, 2022 na Miundombinu ya Maji,  Umeme, na Umeme inaendelea kukamilishwa