VIONGOZI WA WILAYA YA KIGOMA WAJENGEWA UWEZO JUU YA KIWANDA CHA MBOLEA KINACHOTARAJIWA KUJENGWA MANISPAA YA KIGOMA/UJIJI

Posted on: September 13th, 2021

Na Mwandishi Wetu

Kamati ya Ulinzi na Usalama wilaya ya Kigoma na Baraza la Madiwani Manispaa ya Kigoma/Ujiji leo September 13, 2021 zimejengewa uelewa juu ya kiwanda cha Mbolea kinachotarajiwa kujengwa Kata ya Kibirizi  eneo la Katosho

kikao hicho cha uelewa kimefanyika chini ya Mkuu wa Wilaya ya Kigoma Bi. Ester Alexander Mahawe katika Ukumbi wa Manispaa hiyo  ambapo Shirika la Utunzaji Mazingira Ziwa Tanganyika (LATAWAMA) ndilo Mfadhiri wa Ujenzi wa kiwanda hicho

Mkurugenzi wa Shirika la Utunzaji Mazingira (LATAWAMA) Ndugu. Didier Cadelli amesema kiwanda hicho cha kuzalisha Mbolea kitasaidia kuongezeka kwa uzalishaji wa mazao kwa wakulima waliopo Mkoani Kigoma, Mikoa jirani na Nchi jirani kama Burundi na Jamhuri ya Kidemokrasia ya Watu wa Congo

Amesema kiwanda hicho kitakachojengwa kitatumia malighafi za taka zinazooza  zinazozalishwa majumbani na masokoni ambapo zaidi ya Tani mia moja na arobaini (Tonnes 140) za taka huzalishwa Manispaa ya Kigoma/Ujiji kwa siku na asilimia sitini (60%) ya taka hizo ni taka zinazooza

Meya wa Manispaa ya Kigoma/Ujiji Mhe. Baraka Lupoli amesema Manispaa ya Kigoma/Ujiji iko tayari kwa ajili ya ujenzi huo wa kiwanda kitakacholeta ajira kwa wakazi wa Manispaa hiyo na kuinua uchumi wa wakulima wa Mkoa wa Kigoma na Nje ya Mkoa

Mkurugenzi wa Manispaa ya Kigoma/Ujiji  Ndugu. Athumani Msabila ametoa wito kwa wakazi wa Manispaa hiyo kuchagamukia fursa ya ukusanyaji taka huku akisema taka sio uchafu bali ni malighafi inayoweza kutengeneza kipato

Amewataka wakazi wa Manispaa ya Kigoma/Ujiji kwa Kata na Mitaa  ambazo hazijaunda vikosi kazi vya usafi wananchi kuunda vikundi hivyo kwa ajili ya kukusanya taka na kuzipeleka katika maeneo yaliyotengwa na kujipatia kipato kutokana na shughuli hiyo

Ujenzi wa Kiwanda cha Mbolea Manispaa ya Kigoma/Ujiji utawanufaisha Asilimia sabini (70%) ya Wakazi wa Mkoa wa Kigoma  ambao ni wakulima na tayari  Wakazi wa Manispaa ya Kigoma/Ujiji  wamehamasishwa kuunda vikosi kazi vya usafi kwa kila mitaa ambapo wanakuwa wakipita katika makazi, taasisi za Serikali na zisizo za Serikali, na maeneo ambayo  shughuli za kiuchumi hufanyika katika ukusanyaji wa taka, Mitaa thelathini na tatu (33) kati ya sitini na nane (68) zimeunda vikosi kazi vya usafi  ambapo makusanyo ya fedha asilimia sitini (60%) hubaki kwa kikosi kazi huku asilimia (40%) huenda Ofisi ya Mkurugenzi kwa mjibu wa Sheria ndogo za Manispaa hiyo

Picha na video zaidi ingia katika maktaba ya picha kwa kubofya  www.kigomaujijimc.go.tz