VYANDARUA VYENYE DAWA KUGAWIWA BURE KWA WANANCHI KIGOMA UJIJI.

Posted on: May 13th, 2025

Na Mwandishi Wetu

Wananchi wa Manispaa ya Kigoma/Ujiji wanatarajia kunufaika na vyandarua vyenye dawa  195,412 vitakavyogharimu fedha za Kitanzania zaidi ya Billion tatu (Tsh 3,908,240,000/=)kwa lengo la kudhibiti na kupambana na ugonjwa wa malaria.

Yamebainishwa  Leo Mei 13, 2025  katika kikao cha  kujadili taarifa za uandikishaji wa Kaya zitakazogawiwa  vyandarua kilichohudhuriwa na Kamati ya usalama wa Wilaya ya Kigoma, Wataalamu kutoka wizara ya afya kupitia Kitengo cha kudhibiti Malaria(NMCP)  na Bohari ya dawa (MSD) kilichofanyikia Kigoma Social Hall.

Akiwasilisha taarifa Mratibu wa malaria wa Manispaa ya Kigoma Ujiji  Dr. Shabani Magorwa amesema katika Kampeni ya uandikishaji na ugawaji wa Vyandarua umefanyika katika Kata zote 19 za Manispaa hiyo na  jumla ya  kaya  53,987 zimeandikishwa sawa 107.8%.

Amesema Maambukizi ya Ugonjwa wa Malaria ni asilimia 6.6 huku akisema zoezi la unyunyiziaji wa viuadudu katika mazalia ya Mbu yaliyotambuliwa  linatarajia kufanyika mara baada tu  msimu wa masika kumalizika.

Akiongoza Kikao hicho Mkuu wa Wilaya ya Kigoma Dr. Rashid Chuachua ameipongeza Serikali chini ya Rais wa Jamhuri ya Muungano wa Tanzania Dr. Samia Suluhu Hassan kwa namna inavyohakikisha kila Mwananchi anakuwa na afya njema huku akisema atahakikisha vyandarua vinawanufaisha wananchi waliokusudiwa.

Zaidi bofya www.kigomaujijimc.go.tz