WAKUU WA WILAYA WATEULE MKOANI KIGOMA WAAPISHWA, WATAKIWA KUJENGA MAHUSIANO MAZURI NA WANANCHI NA KUSIKILIZA KERO ZAO Oath

Posted on: June 21st, 2021

Na Mwandishi wetu

 Mkuu wa Mkoa wa Kigoma Thobias Adengenye leo June 21, 2021 amewaapisha Wakuu wa Wilaya Wateule  wa Wilaya za Mkoa huo huku akiwataka kujenga mahusiano mazuri na Wananchi na kusikiliza kero zao na kuzitatua kwa kufanya mikutano   

Amewataka wakuu wa wilaya wote waliochaguliwa kuwatumikia wananchi kwa kusimamia miradi ya barabara, Maji, Umeme na miundombinu ya Afya na Elimu inayoendelea kujengwa katika Wilaya zao kwa kuhakikisha viwango na ubora wa miradi unazingatiwa

Ameendelea kuwataka Wakuu wa Wilaya hao kusimamia suala la ulinzi na usalama katika maeneo yao na kuhakikisha wanadhibiti upenyo wa wahamiaji haramu kuingia Nchini kupitia katika  Wilaya za Mkoa huo   kwa kuhakikisha vikao vya kamati za Ulinzi na usalama ngazi  Mtaa na Kata vinafanyika na Wananchi wanashirikishwa  

Aidha Mkuu huyo amewataka wakuu wa Wilaya kusimamia  ukuaji wa uchumi kwa wananchi katika sekta ya kilimo  kwa kuhakikisha pembejeo kwa wakulima zinapatikana na kuepuka kilimo cha mikono  na kutenga maeneo ya uwekezaji kwa kila Halmashauri

Katibu tawala wa Mkoa wa Kigoma Ndugu. Rashidi Mchata akiongea katika uapisho huo amewapongeza wakuu wa wilaya kwa kuaminiwa na kuchaguliwa katika nafasi hiyo  huku akiwataka kutoa ushirikiano kwa kuwatumikia wananchi wa mkoa huo

Wakuu wa Wilaya walioapishwa ni pamoja na Mkuu wa Wilaya ya Kigoma Ester Mahawe, Mkuu wa Wilaya ya Kasulu  P 8608 Col.I.A  Mwakisu, Mkuu wa Wilaya ya Kakonko Col. E.M. Malasa, Mkuu wa Wilaya ya Uvinza Hanafi Hassani Msabaha, Mkuu wa Wilaya ya Kibondo P 8310 Col. A.J. Magwaza na Mkuu wa Wilaya ya Buhigwe Col. Michael Nyangalina

Uapisho huo umehudhuriwa na  Kamati ya Ulinzi na Usalama ngazi ya Mkoa na Wilaya, Sekretarieti ya Mkoa,Wakuu wa wilaya wastaafu, Wakuu wa Taasisi za Serikali na zisizo za Serikali,Viongozi wa vyama vya Kisiasa, Viongozi wa dini, Wakurugenzi wa Halmashauri, Wakuu wa Idara , Waandishi wa Habari na  Wananchi