"WANANCHI WASHIRIKISHWE KATIKA MIRADI YA MAENDELEO" DC KIGOMA Comissioner

Posted on: November 2nd, 2021

Na Mwandishi Wetu

Mkuu wa Wilaya ya Kigoma Bi. Ester Alexander Mahawe Jana Novemba 1, 2021 aliwataka Viongozi wa Serikali na Kisiasa  kuwashirikisha Wananchi katika ujenzi wa Miradi ya Maendeleo Manispaa ya Kigoma/Ujiji

Aliyasema hayo katika kikao cha kuweka mikakati na usimamizi wa ujenzi wa Madarasa arobaini na nane(48) kwa shule  za Sekondari kikihusisha Waheshimiwa Madiwani, Wakuu wa idara na Vitengo, Watendaji kata, Watendaji Mitaa, Wenyeviti Mtaa, Wakuu wa Shule na Viongozi wa bodi za Shule kilichofanyikia ukumbi wa Manispaa hiyo

Mkuu huyo wa Wilaya aliwataka viongozi hao kufanya  mikutano ya Wananchi  mara kwa mara kwa kuwajulisha miradi inayotekelezwa katika maeneo yao  ikiwa ni pamoja na kushiriki shughuli za kujitolea katika kuendeleza miradi hiyo

Alisema "Waheshimiwa Madiwani, Watendaji kata na Wenyeviti wa Mitaa mna wajibu wa kutoa taarifa ya miradi yote  inayotekelezwa na Serikali na wadau wengine wa maendeleo katika maeneo yenu ya utawala na wananchi kuwa na uelewa ikiwa ni pamoja na kuisimamia na mradi kuleta tija kwa jamii"

Aidha aliwataka Viongozi hao akiwemo Mkurugenzi na Wataalamu wake kutembelea Mara kwa Mara miradi hiyo katika kipindi chote cha ujenzi utakapokuwa ukiendelea kwa lengo la kusimamia ubora na thamani ya fedha kwa kila darasa

Awali Mkurugenzi wa Manispaa ya Kigoma/Ujiji Ndugu. Athumani Msabila akiwasilisha taarifa alisema Manispaa ya Kigoma/Ujiji imepokea kiasi cha fedha za Kitanzania Million Mia tisa tisini (960,000,000/=) kwa lengo la  ujenzi wa vyumba vya madarasa arobaini na nane (48) ikiwa ni pamoja na kupambana athari zilizotokana na Uviko-19

Aliendelea kusema fedha hizo zinatarajia kuwanufaisha wakazi wa Manispaa ya Kigoma/Ujij kwa kutoa ajira kwa makundi mbalimbali kama vile Mafundi Ujenzi,  wafanyabiashara wa vifaa vya ujenzi, wachimbaji mawe, kokoto, Mchanga na Mama lishe watanufaika kutokana na kukua kwa mzunguko wa fedha  

Afisa Mchunguzi mwandamizi wa Takukuru Bi. Reonida Mshema alizitaka kamati za ujenzi kuwa wakweli katika manunuzi wakizingatia Sheria ya kupinga Rushwa kazini kifungu cha 15 na Kifungu 28 ikiwa ni kosa kupokea Rushwa kwa lengo la kutoa kazi na ubadhilifu wa mali za Umma

Diwani wa Kata ya Kasingirima Mhe. Abdalah Kiembe  alimshukuru Rais wa Jamhuri ya Muungano wa Tanzania Mhe. Samia Suluhu Hassan kwa kuleta fedha za ujenzi wa miundombinu ya elimu huku akisema Wapo tayari katika kuhamasisha wananchi kushiriki shughuli za ujenzi wa madarasa hayo na miundombinu mingine jambo ambalo baadhi wakazi wa Manispaa hiyo wamekuwa wakishiriki kwa kutoa mda na fedha(mali) zao

Picha na video zaidi unapatikana Maktaba ya Picha katika tovuti ya www.kigomaujijimc.go.tz