WANUFAIKA WA TASAF MANISPAA YA KIGOMA/UJIJI KUJIIMARISHA KIUCHUMI KUPITIA VIKUNDI VYA WAJASIRIAMALI capacity building

Posted on: June 28th, 2022

Na Mwandishi Wetu

Viongozi wa Vikundi vya huduma ndogo za kifedha kupitia Mfuko wa Maendeleo ya Jamii (Tasaf) wametakiwa kuimarisha vikundi vyao ili kukidhi vigezo vya kukopeshwa mikopo ya 10% ya Wanawake, Vijana na watu wenye ukemavu inayotolewa na Halmashauri

Viongozi hao wametakiwa na Mratibu wa Mpango wa Kunusuru kaya Masikini (Tasaf) Manispaa ya Kigoma/Ujiji Ndugu. Izack Vyabandi Leo June 28, 2022 alipokuwa akiongea na Wenyeviti, Makatibu na Wahasibu wa vikundi hivyo katika Mafunzo ya kuhamasisha wanufaika wa Tasaf kuweka akiba na kukuza uchumi wa Kaya zao

Mratibu huyo amesema Wanachama wa vikundi hivyo elfu tano mia tatu na arobaini (5340) ambao ni wakazi wa Mitaa 49 kati ya 68 iliyopo wanatarajia kunufaika na mafunzo hayo kutoka kwa viongozi wao, Wanawake wakiwa Elfu nne mia tisa kumi na moja (4911) na Wanaume wakiwa  mia nne ishirini na tisa (429)  

Ameendelea kusema lengo la mafunzo hayo ni kuhakikisha vikundi vinaendelea kujiimarisha kiuchumi na kuwa na uwezo wa kujikimu kimaisha ili familia kuendelea kupata mahitaji ya Msingi  na kuwa na Miradi mbalimbali  ya kiuchumi

Aidha amewataka viongozi hao ambao vikundi vyao havijaanza  mpango wa kuweka akiba na kukopeshana kuanza ili kunufaika katika kuwekeza katika Miradi mbalimbali kwa kuzingatia katiba na Miongozo waliyojiwekea

Bi.Maimuna Ibrahimu ambaye ni Mwenyekiti wa Kikundi cha juhudi kilichopo Mtaa wa Masanga Kata ya Gungu Ndugu. Dezidel Kalisa ambaye ni   katibu wa Kikundi cha Ilakoze kilichopo Mtaa wa Gezaulole na kata ya Gungu wamesema mafunzo waliyoyapata wataenda kutoa mafunzo na maelekezo kwa wanachama wengine na kufanya vikundi hivyo vinajiimarisha kiuchumi kutokana na ruzuku ambazo wamekuwa wakiendelea kuzipata mara kwa mara  

Katika mafunzo hayo kwa viongozi wa vikundi hivyo mada mbalimbali zimewasilishwa zikiwemo umuhimu wa kikundi kuwa na katiba, Usimamizi wa mikopo,  utunzaji wa kumbukumbu, usimamizi na utatuzi wa migogoro  

Mwezi March na April, 2022 zaidi ya fedha za Kitanzania Tsh Million 500 ziliwanufaisha walengwa elfu kumi na moja mia tano thelathini na mbili (11532) ambapo zaidi ya Shilingi Milion 226 zilitolewa kwa Taslimu huku fedha zingine zikitolewa kwa njia ya Miamala ya simu na benki.