Zoezi la usajiri wa Anwani za Makazi kupitia mfumo wa kielektroniki wazinduliwa Mkoani Kigoma, Postcode

Posted on: February 9th, 2022

Na Mwandishi Wetu

Uzinduzi huo umefanyika leo February 09, 2022 Manispaa ya Kigoma/Ujiji ukiongozwa na Mkuu wa Mkoa huo Mhe.  Thobias Andengenye huku akiwataka wananchi kushiriki zoezi hilo kutokana na faida  zitokanazo na mfumo huo

Mkuu huyo wa Mkoa amewataka Wananchi wa Mkoa huo kuwasimamia wataalamu na viongozi watakaoshiriki katika  shughuli hiyo kwa kuipa majina mitaa kutokana na Mahitaji ya wakazi wenyeji

Ameendelea kusema kufanyika kwa utambuzì na usajiri wa anwani za makazi kutasaidia kila mtu anayeishi Nchini Tanzania kuwa na anwani halisi ya makazi, utambulisho wa watu wanaoishi katika maeneo husika, usajili wa mali, biashara, na kuboreshwa kwa usajili wa vizazi na vifo

Ameendelea kutaja faida zingine zitokanazo na mfumo huo ikiwa ni pamoja na kufikisha huduma za maendeleo kwa wananchi kulingana na mahitaji yao, kupatikana kwa huduma za manunuzi kidigitali, Huduma za dharura, kama vile polisi, zimamoto na magari ya wagonjwa, zinaweza kutambua maeneo yenye dharura na kuyafikia kwa haraka, na kurahisisha  zoezi la Sensa ya watu na makazi inayotarajiwa kufanyika Mwezi August mwaka huu

Mkuu huyo wa Mkoa amehitimisha kwa kuwaagiza Wakuu wa Wilaya, Wakurugenzi na Wakuu wa Idara na vitengo kusimamia zoezi hilo kikamilifu kutokana na faida zitokanazo na mfumo huo

Katibu Tawala wa Mkoa wa Kigoma Ndugu. Rashid Mchatta awali akimkaribisha Mkuu huyo wa Mkoa amesema yupo tayari kusimamia zoezi hilo kwa Wilaya zote za Mkoa huo  kwa kushirikana na  Wataalamu kutoka ofisi ya Mkuu wa Mkoa  huku akisema zoezi hilo litakamilika mapema mwezi May, 2022 kama ilivyoagizo kutokana na Miji, Vijiji na Vitongoji vya Mkoa huo vingi kuwa katika mipangilio iliyobora tangu awali

Naye Mkuu wa Wilaya ya Kigoma Bi. Esther Alexander Mahawe amesema usajiri wa Anwani za Makazi utaleta Mapinduzi makubwa ya maendeleo katika Wilaya na makazi ya wananchi kwa kuhakikisha huduma  za Elimu, Afya na uwekezaji wa Miundombinu ya kimaendeleo inafanyika pasipo kuwa na upendeleo wowote bali kulingana na Mahitaji ya Jamii

Utambuzì wa Anwani za makazi unafanyika kwa kubandika namba za makazi, jina la barabara au Mtaa na namba ya postikodi itakayosaidia kufahamu eneo husika kidigitali, maeneo ya biashara, vitu , watu, Na  Ofisi zote kusajiliwa katika mfumo huo wa kidigitali

 Uzinduzi huo umehudhuriwa na Katibu Tawala wa Mkoa, viongozi wa vyama vya Siasa, Wakuu wote wa Wilaya , Meya wa Manispaa ya Kigoma/Ujiji, Wenyeviti wa Halmashauri, Wakurugenzi wa Halmashauri na Taasisi za Serikali na zisizo za Serikali, Waheshimiwa Madiwani, Watendaji kata na Mitaa, Wenyeviti wa Mitaa, Waandishi wa habari, wasanii, na  Wananchi